Category Archives: review

افكار للريوق من غير حرمان

قياسي

البان كيك او الوافلز من انواع الريوق المحببه وتطلعنا من نمط الرجيم  وخياراتي بتكون ببعض المنتجات المثلجه كونها توفر الوقت خصوصا بايام العمل … الفكره نفسها ممكن تسونها بالبيت اذا ما تحبون الاكل مثلج وتوزعونه بحصص فرديه وتثلجونه وحزه الاكل حطوه بالتوستر او المايكرويف

كل الريوق اللي بحطه الحين 300 سعره او اقل حسب نوع السيرب المستخدم او الاضافات

نحسب حساب ان هالاكل عاده عالي  بالسعرات فعشان ننعم بالاكل لازم نقلل الكميات عشان جذي انا مستخدمه الحجم الميني .. اولا الكميه تحسنني اني ماكله وايد .. ثانيه اقدر اضاعف الكميه اذا ما شبعت او اذا غداي او عشاي بيكون خفيف … ثالثا الشكل حلو ومعروف العين تشبع

اول ماركه : aunt jemima

منتجاتهم متوفره بمركز سلطان وهالحجم  الحصه فيه 10 حبات وسعراتها 240  ( انا افضل استخدم 5 حبات مع ميبل سيرب او اي سيرب لايت ) او سكر ستيفيا مع بيض او تيركي بيكون  وفواكه

با كيك

الماركه الثانيه : kellogg’s eggo mini waffles

واكو منه نوعين اما بالنكهه الاعتياديه او بالقرفه ( الدارسين  ) .. حجم الحصه بالعلبه 12 حبه صغيره او 3 مربعات وسعراتها 260  ( افضل استخدم 5 او 6 حبات ) مع فواكه او سكر بودر او مع جبن تشيدر او ايدام لذيذه ومشبعه

وافلز

Advertisements

مخبز التين والزيتون

قياسي

خبز التين والزيتون

هالخبز وايد عجبني اولا لانه مخبوز من القمح الكامل

ثانيا الخميره اللي فيه خميره طبيعيه بالتالي فتره التخمير الطويله تكسر الجلوتين بالقمح وما تسبب باحساس عدم ارتياح بالمعده

ثالثا وهو الاهم طعمها حلو ومشبع

الفكره اللي تقوم عليها هالمخبز ( وهو مخبز منزلي يعتمد على مبدا التوصيل ) ان كل يوم الاسبوع مخصص ل 3 انواع خبز معينه .. الخبزه صحيه وفيها حوالي 170 كالوري حسب الاضافات المستخدمه

انا جربت كذا نوع وما حسيت بفرق يذكر بالطعم …سعره 3 حبات خبز بدينار واذا كان ساده 4 حبات بدينار

اقل كميه للطلب 5 دنانير والتوصيل ياخذ من دينار الى دينارين حسب المنطقه …رقمهم 25323417

موقعهم بانستقرام : figsoliveskw

كتب تستحق القراءه : المشي

قياسي

الكتب تحتوي على معلومات عامه عن رياضه المشي وفوائدها   اعلى معدل للنبض للمارسه وكيفيه حساب السعرات الحراريه المفقوده عند ممارسه المشي… التمارين  تمارس قبل وبعد رياضه المشي للتاكد من سلامه العضلات مع بعض الجداول  للممارسه المشي سهله وعمليه للمرحله المبتداه والمتوسطه والمتقدمه

مثل هالجدول

نبتدي باول كتاب

نبذه عن مؤلف الكتب

الكتاب الثاني يحتوي على نفس  المعلومات  بطريقه مفصله اكثر

نبذه عن مؤلفين الكتاب

الكتب متوفره بالمجان للاستعاره بالمكتبات العامه

تجربتي مع فريش دايت

قياسي

الحين بحط لكم خلاصه تجربتي مع فريش دايت بناء على هالشهر .. اليوم كان يومي الاخير عطوني يومين زياده يوم لان الاكل كان ييني مخربط ويوم لان اختي اشتركت معاهم وقالت لهم انها عرفت الشركه مني

معاملتهم تيننن من الكل  وخاصه الاخصائيه رباب لاني احبها من قبل ( مريم و ايناس من المكتب )

الاكل راهي واغلبه لذيذ ونظيف وتحسون ان كل شي يتسوه عندهم من الخبز لي الروب (( مع ان روبهم تغير بالفتره الاخيره حسافه كان روبهم يننننننننننن  ))

العاده الشركات الباجي سلطاتهم تكون عاديه او عباره عن كميه كبيره من الخس مع دريسنغ بلا طعم بس سلطاتهم لذيذه جدا وممكن تكون طبق رئيسي

طيبين وايد وايد  ولانهم غلطولي بالوجبات عوضوني بيوم زياده وهذي محد يسويها بالاضافه الى اي شخص يشترك يضاف يوم بحساب اشتراكم وهم عروضهم حلوة مع كل شهرين يعطونكم اسبوعين فري ومع كل 3 شهور يعطونكم شهر فري

الزيارات مع الاخصائية مو محدده متى ما حسيتو انكم محتاجين تروحون سجلو موعد وروحو وما عليها اكسترا شارج

التغيير بالمنيو او التوقيف يصير قبل بيوم وهالشي وايد زين اغلب الشركات يومين على الاقل… بالاضافه اذا قلتو شي ما تحبونه تقدرون تحطون شي بداله  او تطلبون شي معين وهم ينفذونه

الشركه الوحيده اللي تحط محلي صناعي مع الاكل وممكن يحطون لكم اكل مخصوص حقكم برا المنيو حسب الطلب 

التعديل بالمنيو ينفد من ثاني يوم مو من 3 ايام وهم هالشي زين

واهي الشركه الوحيده اللي ما مليت من اكلهم وهالشي مستغربه منه ومفكره اجدد اشتراكي معاهم

الحين الاشياء اللي ما عجبتني فيهم

كنت اعاني معاهم بالتخربط بالاكل لدرجه اني ما قمت ادق اقولهم بالنهايه من كثر ما تعبت 

الحلو مالهم جدا عادي.. اللي يركز على الحلو بالاكل ما تصلح له بس باجي الاكل وخاصه السلطات حلوة

اختياراتهم محدوده نوعا ما باجي الشركات يكون المنيو منوع اكثر بحاول اكلمهم يغيرون الخيارات بين فتره  والثانيه عشان الملل

الحين بتكلم عن معدل النزول … للاسف متذبذب وباجر ان شاء الله موعدي معاهم واشوف بالضبط شكثر نازله

برامج رائعه للرياضه لمستخدمي البلاك بيري

قياسي

هالبرامج تلقونهم مجانا بالستور
اول برنامج miCoach
وبمجرد ما تدخل البيانات من طول والجنس والوزن … رح ينحسب عدد الكالوري بالرياضه وعن طريق حساب الوقت والمسافه يحسبون لكم باي مرحله من الكارديو موجودين فيها وكل لون له مرحله وخريطه بالمسافه اللي مارستو فيها الرياضه عن طريق PGS
ويشمل المشي والركض والدراجه وغيرها وتقدرون تحملون النتايج بالموقع الرسمي وهو

http://www.micoach.com

البرنامج الثاني endomondo
ونفس الشي باﻻضافه الى انك تقدر تتنافس مع شخص اخر بنفس الوقت عن طريق ربط معلوماتكم ببعض ويقدر يحسب لك دقات القلب اذا كان عندك جهاز يشتغل عن طريق البلوتوث

Posted with WordPress for BlackBerry.

result … 1 week pre-diet cleansing

قياسي

الحمدالله خلص اول اسبوع ..واجهت صعوبه فيه لكن الحمدالله النتيجه مشجعتني اني ارد عليه وره العيد مره ثانيه لمده اسبوعين … حاسه اني بصحه احسن والقياسات فرقت معاي ولله الحمد والمنه… وايد مستانسه من روحي ما كنت معتقده اني بكمله اسبوع كامل

مميزاته :

الجسم يتعود على كميه اقل من الاكل وما تحسون بحرمان

تحسون روحكم انشط وبصحه افضل

القياسات رح تتغير معاكم بسرعه

العيوب :

خيارات الاكل يبيلها تخطيط

بالنسبه لي الصداع اول يومين

فهد.. شكرا جزيلا على هالرجيم 

must have

قياسي

اذا كنتو تسوون رياضه وتبون تمارين تشاعدكم بالبيت لازم تشترون هذول عجيييييييبين يننون .. ويصلحون مع wii fit & xbox

ea sport active 2… عجيييب عجيييب ويي معاه سنسر باليد لقياس النبض ودقات القلب بالضبط عشان يطلع الجسم شكثر يحرق وهم سنسنر بالرجل عشان يتاكد من القيام بالحركه بالضبط.. صراحه هذا اكثر واحد احبه فيهم

biggest loser … منو ما يعرف هالبرنامج وهاللعبه بالضبط تعطي التمرين اللي كانو يستخدمونها مع المشاركين وبيوم الوزن يحسوونكم انكم صج مشاركين نفس طريقه الميزان بالضبط وهم التصويت

انا اخذتهم من امازون بس تحصلونهم بالكويت بالرحاب

تقرير لاسبوع كامل مع diet care part 2

قياسي

بسم الله نبتدي …

بعد تجربتي المره الاولى مع دايت كير (( نزلت فيها بس كيلوين اول اسبوع وظل ثابت الى النهايه ))… قررت اجربهم مره ثانيه قبل اطرق حكمي

تجربتي معاهم كانت غدا وعشا مع السناك والشوربه  لمده اسبوعين من غير الويكند… بعد اول مراجعه بعد 10 ايام اكتشفت اني مو ناقصه ولا شي مع انهم مقللين لي الاكل عن المره السابقه…. وريوقي نفس الريوق اللي كانو يقدمونه لي اذا مو اقل.. واكتشف بعد ما اوقف على الميزان ان الوزن ثابت بعد ( وفوق هذا زايد عن ميزانهم الثانتي نص كيلو ) صج صج تحبطت … ووقفت اشتراكي معاهم قلت مابي الاربع 4 اللي ظلت واللي يابوه بعد يومين لي موعد التوقيف ما اكلته

مادري شنو المشكله بالضبط ليش وزني ما ينزل معاهم… بالرغم من ان اكلهم حلو بس شالفايده اذا ما يوفر لي نزول الوزن اللي محتاجته …للاسف ما رح يكون خياري المقبل لمن افكر بشركه توصيل :(…. احس هالشركه تصلح اكثر للي بيحافظ على وزنه اكثر من اللي يعاني من سمنه وبينزل وزنه

عشان لا اظلمهم رح انزل صور الوجبات اللي اكلتها بالاضافه الى الرياضه اللي كنت امارسها وعليكم الحكم

my exercise

6 ايام بالاسبوع  تتراوح بين 30 -40 دقيقه

* كيرفز

* مشي سريع

* صعود ونزول الدرج

my meals

الاربعاء : 13-7-2011

ريوقي

حبه خبز شعير ملفوفه بلبنه وطماط وخيار وزعتر

خلطه شاي ابيض مع اعشاب … وبعدها شربت ماي وخل تفاح

عشاي

ما تغديت واكلت وجبه وحده بالعشا

كالزوني لذيذه محشيه لحم وجبن وفلفل اخضر

فتوش بدبس الرمضان… اكثر سلطه اطلبها منهم

الثلاثاء :12-7-2011

ريوقي :

ساندويش توست اسمر اميركانا
عدد الكالوريز

غداي :

برغر مع جبن و سلطه سيزر.. يم يم

سناكي :

طلبت فروزن يوغرت لانهم ناسين يحطون لي السناك

فروزن يوغرت رمان وايد حلو وحطيت معاه رمان وبلوبيري وكورن فليكس واناناس يم يم

عشاي :

سلطه مشروم
شوربة طماط
ساندويش حلوم نتفه

الاثنين : 11-7-2011

ريوقي:

ساندويشه حلوم من pick نص ساندويشه

سناك الاول :

لبن خالي الدسم و 4 حبات مشمش

غداي :

تبوله
برياني لحم

سناكي :

سينابون _ ما اكلته

عشاي :

شوربه طماط وسبانخ
سمج مع صلصه مع خضار

الاحد : 10-7-2011

الريوق :

نص ساندويش جبن موتزريلا

السناك الاول :

ما كليت شي

الغدا:

فتوش
مقلوبه زهره ولحم

السناك :

حلو الاوريو

العشا :

خضار مع تغميسه
شوربة جريش
برغر مع جبن

 السبت # 9-7-2011

الريوق :

جبن قريش مع تيركي و تفاح اخضر

السناك الاول :

خوخه

الغدا والعشا بوجبه وحده :

نص كوب مرق باميا ونص كوب عيش مع كوب روب خالي الدسم

الجمعة  # 8-7-2011

الريوق :

جبن حلوم مع قهوة

الغدا والعشا :

برغر من شيك شاك مع دايت بيبسي

الخميس # 8-7-2011

ساندويش تيركي

الغدا :

فتوش
سمج مع خضار مع بطاط مع شمندر

السناك :

حلو التك

العشا :

متبل الشمندر
شوربه
ساندويش حلوم

الاربعا : 6-7-2011

الريوق :

ما تريقت

الغدا :

تبوله
باستا

العشا :

سلطه
سمج مع بطاط مهروس

تجربتي مع الماء والليمون على الريق

قياسي

وايد قريت عن فوائد كوب الماي الدافي وعليه جم عصره ليمون على الريق

منها ينقي الجسم من السموم وهم يساعد بحرق الدهون

ولاني خبر خير كل شي اجربه بعمري قلت نجرب شوراي

المفروض اشربه على الريج وبعدها بساعه اكل اول وجبه

النتيجه : حااااارج شب ببلعومي وما راح الا بنص اليوم

طعمه لا باس فيه بس الحارج خرب عليه

رايي فيه : مرح اعيده

review : salada white tea

قياسي

الشاي الابيض فوائده عديده جدا لانه غني بمضادات الاكسده .. كما يعتبر مصدر للقضاء على البدانه لانه يزيد عمليات الايض بالجيم فيعتبر كماده منحفه

انا استخدمه عشان الجزء الثاني

اولا هالنوع اللي اخذته مثل ماهو مذكور خالي من الكفايين  ( اكو نوع عادي من نفس الماركه ) اشربه مره وحده في اليوم اما الظهر او مع الريوق

طعمه بروحه لا باس فيه بس انا اضيف له اعشاب اخرى لتحسين مذاقه

النتيجه اللي حصلت عليها ما شاء الله سريعه… احس انه شال الانتفاخ ببطني خلال اسبوعين من المداومه المستمره .. عيبه انه مدرر سريع للبول اجلكم الله 

عن نفسي حبيته .. تحصلونه بمركز سلطان ب دينارين تقريبا